قبل كم يوم قريت خبر يگـــــول إنه محكمة التمييز ردت طلــب رئيس جمهورية العراق الاسبق غازي عجيل الياور اللي يعتــرض بيه على قرار ايقاف راتبه التقاعدي بموجب قانون التقاعد الموحد لعام ٢٠١٤ ..
مذكور بهـذا الخبر ، انه الراتب التقاعدي الشهري لفخامته چان ٦١٦٨٠٠٠٠ واحد وستين مليون وستمية وثمانين الف دينار !
طلعت حاسبتي وضربت رواتبه من ٢٠٠٤ لحد ٢٠١٤ طلــع فخامته مكلف خزينة الدولة العراقية مبلغ إجمالي مقــــــداره ٧٤٤٠٠٠٠٠٠٠ سبع مليـارات واربعميــة واربعين مليون دينــــار عراقي ، وهاي رواتبه فقــــط ، يعني لاحماياته ، ولاسياراته ، ولابيوته ، ولا اثاثه .. الخ ..
وآني اقرا هذا الخبر إتذكرت قبل فترة شفت برنامــــــج على ناشيونال جيوغرافيك يحچي عن بداية شركة المراعي السعودية لانتاج وتوزيــع المنتوجات الحيوانية والالبان وشلون أول شــــــي بدت الشركة تشتغل بـ ٣٥٠ هايشــــــة ، والهايشة جرت هايشة لحــــد ما صار عدهم ١٧٠ الف هايشة واحتلت المركز الاول عالميا” بانتاج الحليب ومشتقاته ..
رحت سويت بحـــــــث عن شركة المراعي لگيتها تشغل ١٢٠ الف موظف فقط بمصانعها بالمملكة ، و ٣٥ الف موظــــــــف بمصر ، وبكل دولة بيهه مصانعها ومعاملها تشغل مالايقل عن ٢٠ الف موظــــف ، وعندها مصانع بالارجنتين والبرازيل ومصر والجزائر وجنوب افريقيا ، ودخلـها السنوي مايقل عن عشرة مليار ريال سعودي !
رجعت للمبلغ الكلي اللي چان ياخذه فخامــــة رئيس جمهوريتنا المفدى وقسمته على مليون وميتين الف دينار سعر هايشة وحدة طلعلي الناتج ٦٢٠٠ هايشــة !
يعنـــي اتصـــوروا راس واحد مثل غازي عجيـل الياور لوحــــــده چان يعادل ٦٢٠٠ هايشـــة ! ..
إنتظروني باچر اسولفلكم على معمــــــل القنـادر اللي بأثيوبيــا ونسوي مقارنه وياه و ويه السيد المالكي ونشوفه كم قنــدرة يسوه ..
ارجعلي زميلي المخرج ..
هذا الفاشل وامثاله بالعشرات وبالمئات اللذين لم يقدموا للعراق والعراقيين اى شيء مجدى ومفيد لا بل اضروا بالعراق والعراققين ودمروا البلاد والعباد وهجمان البيوت والتشريد والتهجير وخراب الوطن والتخلف والضياع كان المفروض ان يقطع رواتبهم الفلكية منذ زمن بعيد الهايشة افيد بكثير من هؤالاء الطفيليين