المرأه صوت او جاه ..
المرأه ثوره
روح اقـره بالتاريخ ..
يشهد بامرهه
***
علم اوجمال اخلاق..
عزة عراقي
امنوع ورد اشكال ..
فخر البلادي
***
لو مرَّن الحلوات ..
چنهن (فخاتي)
شمس اوگمر وانجوم ..
بيهن تباهي
***
ارد احچي ع (السمرات)- ..
والشعر قسطور
والرمش غاوه الليل ..
والشامه چن نور
***
شفت الضوه امن ابعيد..
حسبالي گمره
لما اگربت ليجاي ..
لاگـتني (شــگره)-
***
متعليه وي النجوم ..
شعرچ كلبدون
والشفـَّه چن رمان ..
يا ليل اللعيون
***
الورد منچ غـار نـام ..
اعـلـه خـدچ
والشمس منهه اخيوط ..
تظفرابشعرچ
***
(شنهي الجمال البيچ) ؟
والنظرة تچوي
هلال الحواجب هاي ..
من بعد تضوي
***
لبنيه بت (بغداد)..
مثل الغصن بان
كرخ اورصافه بيچ ..
للحسن عنوان
***
زلفچ يلاوي الخد ..
والفاله بيدچ
البنيه بنت (الهور)..
بالدنيه صيتچ
***
يـبـنيه بنت (اجبال)..
هيبه او مهابه
من تمشي چن زلزال ..
قوه اوصلابه
***
لون السمه العيون ..
والرگبه مرمر
-(غربيه) بنت اشيوخ ..
والنظره تسحر
***
هم حسن هم اخلاق ..
هم رقه بيهه
البنيه بت (سنجار)..
جاروا عليهه
***
بنت (الجنوب)..
افيش ياهو المثلهه
شرق او غرب مـَ اتشوف ..
ماكو ابحسنهه
***
بستان الورد الوان ..
بالعلم مشهود
ينهض (عراقي) يوم ..
تاريخه محمود
——————————
تشرين / 2024
ســـــــــــــــــتوكهولم
