يابو محابس ذهب
بالاذن ترچيه
الگلب صافي ذهب
والذمه مبريه
ياصفحه بيضه…
امن الگلب بالعيد عيديه
واتنطرت مامش خبر
والصبر مل بيه
صخرة اگـْطِعـَـت…
وسط النهر
وانگطعت الحنيه
الوكت چنه حلم
او باقي العمر تاليه
عيني على دربه يجي…
ما ضن اله جيه
يابو محابس ذهب
بالاذن ترچيه
***
رد الزمن بينه رجع
لا خـِـبـْـره خذنه …
اولا درس
المرض هوّه المرض
واليوم يشبه امس
الدغل عشعش كبر
والشمس تبقه شمس
الصبر ملنه الصبر
يا دنيه وينه اليـِحس
يا روحي كفي عتب
مخنوگ بيچ النـِفـَـس
ارد اسألك شنهي السبب
والدنيه مگضيه
يابو محابس ذهب
بالاذن ترچيه
لم اقرأ منذ مدة طويلة قصيدة في الشعر الشعبي باللهجة العراقية. هذه قصيدة جميلة بمفرداتها التي اختارتها الشاعرة بدقة، وبصورها الشعرية الذكية الجذابة التي يمكن ان تتحول إلى بانوراما من عدة لوحات فنية زاخرة بكل الألوان الزاهية. قرأتها عدة مرات وفي كل مرة ازددت اعجابا بها. أحسنت