مشهد تمثيلي ساخر 20
* على الويل ويلي سـطه / ابن الحمولة سـطه
باك الحـجـل واسـكـطه / وخـلـه الرجل خالـيه
– خير جاسمية منو باك الحـجـل
* ياحجل ابو جويسم .. أكبر من الحجل
– لا بالله .. شعدنه أكبر من الحجل .. قابل باكو الورور مالي
* ولك ابو جويسم باكو البنك
– البنك…!! شلون ينباك … مو بي قاصه حديد
* والله انت كَـلب سمجه .. هو ابو القاصة منو … غير مجلوب السلف
– يعني مجلوب السلف باك البنك …؟ والحكومة وين !!
* الحكومة نايمة ورجليها بالشمس
– بروح ابوج ما تكَـليلي شلون يبوكَون البنك
* انه أكَـلـك .. مجلوب السلف بايـك القاصة وضام الملايين بـبـيت عمته
– ها .. وعمته فضحته ؟
* لا .. شلون تفضحه عمته .. ربك سبحانه وتعالى فضحه
– معقولة ..
* اي معقولة .. الله ما يضرب بحجار ، إجـت مطرة كـلـش على سطح بيت عمته وغركَـت البيت
– اي .. وشجاب المطرة على مجلوب السلف وفلوسه ؟
* المطرة غركَـت البيت والدنانير طوفن بالدرب … والناس من شافت الملايين طايفه
راحت ركض لمركز الشرطة ولموا الدنانير وسلموهن للحكومة
– وشلون عرفوا هاي مال مجلوب السلف
* شافوا توقيع المحفوظ مجلوب السلف على الدنانير وعرفوا هي مالته وضامها إبـيـت عمته
– كَـولي غيرها جاسمية .. لاتنكَـلب بينه الدنيه .. صايره .. دايره ، واحد ضام البنك إبيت عمته
* اي صايره .. ما سمعت !! ناقشوها بالبرلمان ودزوا علـيّه شاهد لان آنه شفت الدنانير مسيسه بالشارع .
– جا .. مالميـتـينه شجم مليون نروح بيهن للحج
* عمت عينك ابو جويسم تريد تروح للحج بفلوس مجلوب السلف .
رابط الحلقة السابقة
http://www.ahewar.org/debat/show.art.asp?aid=617251
