مشهد تمثيلي ساخر 17
* خايب هو .. خايب هو .. خلاني وراح وراح …خايب هو
والكَـلب مامرتاح…خايب هو … ما اريده خله يروح .. خايب هوب …
– آنه اخوالمتصرف .. شنو هاي جاسمية .. شجاج تسودنتي .. فضحتينه
* لاتسودنت ولا شي .. وين الفضيحة .. هي بسته بالمناسبة
– شنو المناسبة .. عرس .. طهور .. حنه .. !!!
* اي عرس وحنه وطهور .. اشرايد بعد اكثر
– يابه على كيفج .. بها الليل .. الناس نايمه .. وين العرس وين الطهور .. لاحول ولا قوة .
* ما سمعت بالاخبار .. اللي ذاعوها بالراديو
– وانا ما عندي شغل وعمل .. يعني أعوف رزقي واكَابل الراديو
* ابو جويسم .. يا شغل .. هي كلها شجم كلاو تلبسّهن للمكَاريد .. وتفرهد براحتك .. يا شغل .. يا عمل !
– ليش جاسمية .. هذا التعب من الصبح لليل واكَـف بباب الحكومة واخلص معاملات الوادم مو بعينج ؟
* لا عيني ، خليه سكته .. انا شطالع بيدي .. انت ويه الحكومة راسين بفد لباس .
– هاي فوكاها النوب انا والحكومة راسين بفد لباس .. صدك لو كَالو .. سوي زين وذب بالشط .
* هسه ما علينا .. الرئيس وربعه راحو لدار حقهم .
– ها .. يا معوده .. شتكَولين .. احنا شعدنا غير الريس .. رزقنه بيده .. وداعتج بلا الريس عانه ما نسوه .
* لا يابه .. انته عانه ما تسوه مو احنه … احنه نسوه ابو العانة .. اذا انت تفرهد باسم الريس .. احنه ما ناكل حرام .
– يعني هسه صار جويسم ياكل مال حرام .. كل هذا التعب والركض بالمواكب واللطم .. مو بعينج .
* انت ما تركض ولا تلطم على الحسين .. انت تلطم على الهريسه .
– اي قابل الهريسه مال الخلفوج .. هي هريسة ابا عبد الله .. واحنا ببخته … ما كَلتيلي شكَال الراديو .؟
* ذاعوا بالراديو يكَولون الريس وربعه طلعوا تقاعد .. تدري شكثر طلعلهم تقاعد ؟
– لا والله .. يعني شيطلعلهم ؟ غير مثل تقاعد ابو جويسم ، اربعطعش الف دينار وبالزايد سباعطعش الف دينار .
* خاف ما تقبل .. ولك ابو جويسم هذوله تقاعدهم بالدولار مو بالدينار .. دولار يطك دولار
– بويـــــــــــــــــــه .. بالدولار .. !! جا كَولي تفرهدت الخزينة .. اذا ريس وتلاث نواب كل واحد ياخد سباعطعش الف دولار .. يعني كسر بجمع تصير الف تالاف دولار … اي بالله تفرهدنه.
* عمت عينك ابو جويسم .. جا وين صويحبك مجلوب السلف .. مو كَلت راح نبربع .. ولك نهبوا الخزينة .. شبقالك .. ما مش غير التفاليس … روح .. روح الحك على الهريسه واللطم .. هاي قسمتك .
وخايب هو .. خايب هو .. خلاني وراح وراح … خايب هوب …..
رابط الحلقة السابقة
http://www.ahewar.org/debat/show.art.asp?aid=614448
