دەستەك گەرم
دەنگەك نرم
چاڤ ژی ب شەرم
یا هۆ بوو یار
وێ دلبەرێ
رەش ئەسمەرێ
دێم فە نەرێ
دل کر بەیار
دل پڕ ب جۆش
یا مەندەهۆش
ئەو ناز فرۆش
مام بێ هەدار
هەدار نەما
بارێ غەما
هەر بوو مە ما
ما کانێ وار
وار ل مە فرۆت
حەستی ڤەڕووت
خەم کرنە جووت
ئەوێ دەوار
گەنج بوون شەهید
لاو ئو عەگید
ل مە نەما عید
ژ بەر سەیێ هار
میرێ ب ستەم
گەل هەر ب خەم
ما چ بکەم
رۆژ نە دیار
رۆژ نە هەلات
خەو بوو خەلات
بەر بوو وەڵات
ژبەر یێ مرار
برا رابن
بەس د خەو دابن
هندی مابن
لێبکەن هەوار
لێبکەن گازی
وی بەرازی
سەیێ تازی
کا بینە خار
کا بینە دەر
یێ بێ مەفەر
ما بێ خەبەر
گەش بوو بهار
ڤێ دبێژم ئەز
نەی گێژم ئەز
داتڕێژم ئەز
هەلبەستێن هار
هەلبەستێن دین
ێن پڕ ئەڤین
جەرگ ژی بخوین
پڕ بوو ترار
هێژ گەل دخەو
بێ هشە ئەو
بێ نان و دەو
نەما گرار
یێ پیس مرۆڤ
دەهبە ئو هۆڤ
کو نە چ تۆڤ
پیلکێ نەیار
نەیار پەرست
بوو دار و دەست
ویژدان ڤەڕەست
ژێ کەتە خار
حەیفەك گران
هندەك کوردان
پێوان هێلان
بوگورگێ هار
ملله ت فرۆت
لاندك و مشووت
گوهـ کرنە جووت
بوون ئەژدەهار
ێد کەن گەفا
ێن بێ وەفا
ئەوێن ب جەفا
پڕ دڕك و خار
دگەل دوژمنا
ێن دکەن سەما
چ دبەر نەما
ێد بووین تیار
ێد بووین سەپان
ب ئالیك و نان
شەرما گران
مانە بێوار
بێ سەروەری
خاك هەلوەری
ما یێ گەڕی
مای بێ بڕیار ٠
شیرزاد زین العابدین
