دلێ من بوری ئێڤارە
سەرێ من گێژ پێ پوتینە
ئەڤ ئێڤارە گەلەک سارە
چاڤێن دامای دل غەمگینە
رۆژێ پەڕێ خو داهێلا
هەتاڤ سوورکا وەرە ببینە
چ جانیەکا قەشەنگا لێ
سپێدە هەمی تە گورینە
تە چەند هار بەردان بەیارا
پەزێ خوە کا تو بجەمینە
ژ رێکا من ڤەدە دەحلا
ئەڤ چ پێژان و سترینە
ژ دیدارێ من نە دویرکە
کو چاڤێن من دبرسینە
ل تە چ گەشە بهارە
ل من سووتن دل و سینە
ژ چاڤان تە دوڕ دبارن
تە لێڤ شەکر و هنگڤینە
ب ئێک نێڕینا چاڤێن تە
دل و جەگەر ڤەلەرزینە
چ لێبکەم مولکێ دونیایێ
بو چنە چین و ماچینە
کالک دڕها ل رێکا تە
نێ من پەهنی کەلشتینە
هەر بهوستەک ب سەد سالا
کو من پێنگاڤ تێک بەستینە
وەرە زاڵم پێنجەهو شەش
بهار ژ ژیێ من بورینە
چ ستێرەکا گەشە ل ئاسمان
ژ گوڕوهێ ماهو پەروینە
بەس ئاگری بەردە دلی
کەزی و بسکا بەس ب هەژینە
ما کەنگی هویە دلداری
ما ئەڤ جەنگە ئان ئەڤینە؟
دلێ من تە ژ من بارکر
هەر جارەکێ تو ب زڤڕینە
بارێ غەما کا تو بهێلە
وی رویباری کا ب شەقینە
تە لێڤ ئال وەک هەلهەلوکێ
تە سینگ و بەر سوریازینە
چ گەش بهارە دێمێ تە
ئەو چ چەروان و شەڤینە
ئەو چ گولێن بستیک زراڤ
ئەو چ سێڤ و چ هرمینە
ئەو چ هێڤە ل سەر هێڤەکێ
ئەو چ بێلا شانەشینە
ئەو چ فێقیێ هو گەهشتی
ئەو چ توهیرک و توینە
ئەو چ کەمەرە ل ناڤ تەنگێ
ئەو چ شالە چ رویشینە
ئەو چ چاڤێن دل هەنگێڤن
ئەو چ تیرێن ئاگرینە
ئەو چ باقوفکێن نە ڤەبووی
ئەو چ دلێن ئازرینە
ئەو چ دلە هوسا یێ کەل
ئەو چ دوژەهو چ ئێتوینە
ئەو چ بێهنە هویانەرم
لویلاپەڕێن بەرچەلینە
ئەڤ ئەڤینا هویا موکوم
دێ بێی کەڤرێن خوەڕستینە
ئەو چ هەیڤا خەرمان گرتی
ئەو چ زەندن ئەو چ روینە
ئەو چ پڕچێ هو تا بەڵاڤ
لێڤ هنارکێن رادۆشینە
ئەو چ خالە ل رویێ تە
ئەو چ بەردلک و مورینە
ئەو چ مێخەک ل دفنا تە
ئەو چ سوسن چ سولینە
ئەو چ قەدە ئەو چ بالا
چ گەردەنا رەنگ زێڕینە
ئەو چ قوتکە ئەو چ کراس
ئەو چ نترک گولالینە
ئەو چ تیتە ل ئەنیا تە
لەوەندیژی ئارمیشینە
ئەو چ تیرن ژ چاڤا دبارن
ئەڤ چ دلێن هەڕشینە
ئەو چ نەرمە رێڤە چوونە
ئەو چ ناز و دالەهینە
ئەو چ بەندن چ حەیرانۆک
ئەو چ زێمار و نارینە
ئەو چ پت پت چ گازندە
ئەو چ داخاز و نفرینە
ئەز چ بێژم هێشتا کێمە
گووتن هەمی دقەڕسینە
وەک نازا تە قەد نابینم
نە چ ستی و نە چ زینە
نە سنەیی و نە سابڵاغی
نە مێردینی و نە چەلینە
وەرە ئاڤدە ڤان گولزارا
پانێ باقوفک چرمسینە
گەر تۆ ل گەل من بی دەلال
یەک پاکی من ب دنێ نینە
هەر ئەڤینە یا مای زەڵال
سەروکانی تەڤ شێلینە
بهارا من تویی هەردەم
وەکی رۆژێ سەرهەلینە
تە پەیمانەک دابوو دیلبەر
کانێ سۆزێ تۆ ب جهبینە
ئەڤ دلێ هەردەمێ ب ئازار
چەنک و پەڕژی دسووتینە
بلا رەهمەک ل مە بباریتن
کو لێڤێن من دتێهنینە
وەرە بەر سیبەرا کەڤرا
کوردستان وارەکێ هینە
یێ نەزانیت بێهنا بها
باوەربکە یێ هار و دینە
بهارا تەڕ ب مژو و موران
زڤستانا مە بەفرینە
دلێ ژار نێ هەرێ ل تاقە
وەرە جارەک ل ڤر روینە
وەسا سڤک ل بەر دلی
ما ئێک وەک تە یا شرینە
دەریکە سوحبەتا چاڤا
دلێ خوە قەد نە خاپینە
کو بەرسفک دویکێلێ گرتن
جارو بارا هەلبژینە
ل نەیارا قەد نەزڤڕە
تو دزانی کا ئەو کینە
چ بەکرۆک لەوچە و چڤێلن
هەمی پێگڤە د لەوتینە
وەک هێسترا مێشک هاتیێ
وەکی ستێنگا د ئێورینە
چ سەر هشک و هەم نەزانن
دلێ وان یێ بکەرب و کینە
وەک دارا هشک دێ بێژی کۆ
ئەڤ نەههدەهسالە د مرینە
قەی باشیێ نابینن ئەو
دلێ کۆرە چاڤ پەقینە
چ دەرمانێ ڤێ دل رەشیێ
ژ رێکێ ئەو تەحسینە
وەرە جیهانا دلدارا
کا زۆزانا تو بچەرینە
کوردستانا مە رەنگینە
دول و نهال فەڕاشینە
وەرە زاڵم دا تە ببینم
جەرگێ بێزار دلێ بخوینە
ئەگەر هێشتا نە بشکوڕی
دێ من ژ ڤێرێ راتەقینە
بولبولێ ژار بێدەنگ مایە
یێ بێ خوناڤ و ئەسمینە
م پشت چەمیا وەک گۆپالی
پراسی ل من تێک پەشینە
ئەڤ ئێخسیرە گێژ و لال مان
سەودا سەرو هەلهەلینە
ل بەندا تە قەڕمۆکی بوون
هەمی پێگڤە د هەفسرینە
بێ سەر و بەر پڕچێ بەڵاڤ
دێ بێی گورگا ڤەچڕینە
تەڤ قەهر و کۆڤانا ژدلی
تۆ بدە بای و بفڕینە
من نەڤێت رۆژەکێ ب خەم بی
دوڕا ژ چاڤا نە بارینە
نەیارا تۆ ڤەدە ژ رێکێ
ژ مروەتێ د قەموختینە
چ بێ بها و چ بێ نرخن
وەک سماقێ د بشافتینە
وەرە ئاڤاکە تۆ دلی
نێ بەرکاشخانک دهەڕفتینە
کا ببشکوڕە وەکی رۆژێ
کا وان خەما بهەلوەشینە
کا کێ دلێ تە هێلایە
کو وان چاڤ لێ پەڕچقینە
زەروێلە ئەڤ ساڵ نەهاتن
هودهود و کەو نەزڤڕینە
کانێ گاسڕە، کا رەشوێلە
بهار بێی وان بهار نینە
تۆ بکەی بێ دلیا دلی
تۆ بخودێ ماگونهە نینە؟
ئەگەر هەر هۆ بنالم ئەز
تۆ بخودێ قەی ما ئەڤ ژینە
گەر تە نەڤێت نە بشکوڕە
پیچەک لێڤا ب لڤ لڤینە
هەتا سپێدێ ل بەندا تە
ژ هزرادا مە خەو نینە
کو رؽکاتە گول و گولزار
یا من پڕ دڕک و داسینە
هەر وەزم ستێرا د هەژمێرم
گوندی هەمی د نڤستینە.
٢٠١٠
شێرزاد زین العابدين
