مشهد تمثيلي ساخر 25
* فاسقني كاسا وخذ كاسا اليك… فلذيذ العيش أن نشتركا
– هاي شنو أبو جويسم …شو هم رجعنا على الكاس والطاس!
* آني يا هومالتي … هو السيد الحبوبي يكَـول ناوشني بيك زحلاوي
– الله لا يرضه عليك .. ذبيتها بركَـبة السيد .. شجاب السيد على الزحلاوي مال الخلفوك
* يعني قابل آني ناظم هاي القصيدة العصماء .. ما سمعتي داخل حسن يغني
ياغزال الكرخ ياويلي عليك .. انا الياويلي
– لا يابه داخل حسن ما غنه هاي الاغنية .. داخل حسن غنه : يمه يا يمه …
* اي انتي ظلي بها العقل .. البارحة مجلوب السلف سمعنا قوان مال زمان الاول .. ابو كاظم يغني:
اويلي يا ويلي .. انا الياويلي
– والياويلي شجابها على غزال الكرخ
* يعني غير غزلان الكرخ ياخذن العقل .. مخصوص بعد البيك الثالث .. ايباه .. شلون زحلاوي عد مجلوب السلف .
– اي بالكرخ غزلان .. !! وهنا بالرصافة احنا طليان.. هذا قصدك ها ..؟
* لا .. وداعتج جاسمية .. سويلي ما عون جاجيك .. اجيبلج باجر جرغد بريسم
– وهذا صاحبك شلون يكول :
فاسقني كاسا وخذ كاسا اليك فلذيد العيش أن نشتركا
* ليش شبيها .. كاس اله وكاس الي .. السيد ما كَـايل غلط
– لا .. هو اذا صدك يحب ، ما يؤمر حبيبه
* اكَـلج .. انتي هواي ثخنتيها .. هو بيك زحلاوي .. شدخلتيها بايراد ومصرف ..
متكَـلـيلي شـيكَول يرحمه لذاك الاب
– يكَـول :
اتهنه باول كاس والثاني ليه …يا اسمر لذيذ العيش نشرب سويه
مو يكَول اسقيني أول كاس واخذ الثاني الك
* اكَـول .. انتي … تفتهمين أحسن من السيد .. هو أبو العلم والشعر والادب والفقه والمعرفة ….
لا تتحارشين بالساده … تره يـشــورووووون
– ما طول يشورووووون .. ليش ما تسمع حجيهم وتبطل الفرهود انته وصاحبك مجلوب السلف
* شوفي جاسمية : الساده يشوروووون .. بس ما يكًـطعون رزق العالم ..
شلون نعيش اذا مو مجلوب السلف يناوشنا المقسوم من وره ظهر الحكومة …
بعدين انتي بهذا حجيج طيرتي الزحلاوي من راسي ونسيتنا غزال الكرخ وطلايب السيد
ياغزال الكرخ واوجدي عليك / كاد سري فيك أن يُـنـتهكا .. انا الياويلاه …..ويلاه …
رابط الحلقة السابقة
http://www.ahewar.org/debat/show.art.asp?aid=628511
