دەنگەک نەرم
دەستەک گەرم
چاڤ ژی ب شەرم
یاهۆ بوو یار
وێ دلبەرێ
رەش ئەسمەرێ
دێم فەنەرێ
دل کر بەیار
دل پڕ ب جۆش
یا مەندەهۆش
ئەوناز فرۆش
مام بێ هەدار
هەدار نەما
بارێ غەما
هەر بوو مە ما
ما کانێ وار
وار ل مە فرۆت
حەستی ڤەڕۆت
غەم کرنە جووت
ئەوێ دەوار
گەنج بوون شەهید
لاو ئو عەگید
ل مە نەما عید
ژ بەر سەیێ هار
میرێ ب ستەم
گەل هەر ب خەم
ما چ بکەم
ڕۆژ نە دیار
ڕۆژ نە هەلات
خەو بوو خەلات
بەربوو وەڵات
ژ بەر یێ مرار
برا رابن
بەس د خەودابن
هندی مابن
لێ بکەن هەوار
لێ بکەن گازی
وی بەرازی
سەیێ تازی
کا بینە خار
کا بینە دەر
یێ بێ مەفەر
ما بێ خەبەر
گەش بوو بهار
ڤێ دبێژم ئەز
نەی گێژ ئەز
داتڕێژم ئەز
هەلبەستێن هار
هەلبەستێن دین
ێن پڕ ئەڤین
جەرگ ژی ب خوین
پڕ بوو ترار
هێژ گەل دخەو
بێ هشە ئەو
بێ نان و دەو
نەما گرار
یێ پیس مرۆڤ
دەهبە ئو هۆڤ
کو نە چ تۆڤ
پیلکێ نەیار
نەیار پەرست
بۆ دار و دەست
ویژدان ڤەڕەست
ژێ کەتە خار
حەیفەک گران
هندەک کوردان
پێوان هێلان
بو گورگێ هار
مللەت فرۆت
لاندک و مشۆت
گوهکرنە جووت
بوون ئەژدەهار
یێ دکەن گەفا
ێن بێ وەفا
ئەوێن ب جەفا
پڕ دڕک و خار
ل گەل دوژمنا
یێ دکەن سەما
چ دبەر نەما
یێ دبووین(تیار)
یێ دبووین سەپان
ب ئالیک و نان
شەرما گران
مانە بێ وار
بێ سەروەری
خاک هەلوەری
ما یێ کەڕی ؟
مای بێ بڕیار
هەر هاڤینە
وار نە هینە
زویر بەهینە
کوزری چنار
وەک پەپیکا
ژی چوو زویکا
سەد خوزیکا
پار و پێرار
فرۆت وەڵات
زەڤی ئو ڵات
باش بوون خەلات
هەڕفت دیوار
گر ئو زەڤی
ئاڤ ئو کەڤی
خارن ب دەڤی
نەهێلا ئار
تەف داعویرا
گر ئو میرا
ب شیر و تیرا
گەل ما هەژار .
شيرزاد زين العابدين
نەی گێژ ئەز
یا ڕاست = نەی گێژم ئەز
داوا لێ بورینێ دکەم